Koi tumse pooche kaun hoon main

Koi tumse pooche kaun hoon main,

keh dena koi khaas nahin.

ek dost hai kachha pakka sa,

ek jhoot hai aadha saccha sa,

jazbaat ko dhake ek parda sa,

ek bahana hai accha sa.

jeevan ka ek aisa saathi hai,

jo paas ho kar bhi paas nahin,

koi tumse pooche kaun hoon main,

keh dena koi khaas nahin.

hawa ka ek suhana jhoka hai,

kabhi nazuk to kabhi toofan sa,

shakl dekh kar jo nazrein jhuka le,

kabhi apna to kabhi begana sa.

zindagi ka ek aisa humsafar,

jo samandar hai, par dil ki pyaas nahin,

koi tumse pooche kaun hoon main,

keh dena koi khaas nahin.

ek saathi jo ankahin kuch batein keh jaata hai,

yadon me jiska ek dhundla chehra reh jaata hai,

yun toh uske na hone ka kuch gum nahin,

par kabhi kabhi ankhon se ansu ban ke beh jaata hai.

yun rehta toh mere tasavvur me hi,

par in ankhon ko uski talash nahin,

koi tumse pooche kaun hoon main,

keh dena koi khaas nahin.

"I'm not going to spend my life chasing people.You wanna leave? fine then, go ahead. Cause I'm done with chasing and caring for people who never had interest in me. Nothing last and people change. I've learned love is hard and life is strange."